ودنا بالطيب بس الدهر جحـاد طيـب
---------------------- كل ما تخلص مع الناس كنـك تغشهـا
يدك لامدت وفاء لاتحرى وش تجيـب
---------------------- كان جاتك سالمه حب يـدك وخشهـا
كل ماشبيت نار المحبـه مـع حبيـب
---------------------- قام يسحـل فـي مشاهيبهـا ويرشهـا
وكل ما واجهت لك فالزمن وجه غريب
---------------------- مثل ماقال المثـل دام تمشـي مشهـا
وذمةٍ ماهيب تنـدار للحـق المصيـب
---------------------- جعل قشاش الحطب لاسـرح يقتشهـا
__________________
الموت موت الضمير وموتة الذمه
---------------------- ونفس ٍ رضت من رداها في مذلتها
ما الميّت اللي بموته ينتهي همه
---------------------- الميّت اللي حياته مثل قلـّتها
كم واحدٍ طاب ابوه وخاله وعمه
---------------------- وإيده من الطايلات الله مفلـّتها
لو يستحي قاصر الشوفه على دمه
---------------------- ما جاهرَت روحه الجربا بعلتها
عبدالرزاق الهذيل
الصمت حكمه والكلام اكثر من اللازم غبا
ما دام فالدنيا مواقف ما يعبّرها كلام
وانا اشهد اني مندفع من يوم خفاقي حَبا
الين لحّـقني معَ العالم ومعء نفسي ملام
قمة غبائي يوم اردّد ..وصَل السيل الزبا
وأهدّ مرقب هيبتي وابني من أنقاضي غـرام
لا والله الا في أمان الله والعشق يهَبا
ولا ينقـّص من روافد عزتي ( ملي جرام )
فيصل السواط
من كثـر ماله ساروا الناس برضاه
---------------------- ولو كان ناقص .. قالوا الناس : وافي
ومن قلّ ما بـِيده ترى الناس تشناه
---------------------- لو كان يسقيهم عسل قنـد صافـــــي
فالمال كم ساسٍ طمانٍ وعلاّه
---------------------- والفقر كم حطـّم روابع سنافــــــــي
لا شك ما للعبد عن حكم مولاه
---------------------- من خير ولاّ شر والرب كافــــــــي
ما كتـب للمخلوق لا بد يلقاه
---------------------- أمّا هزايم شرّ ولاّ عوافــــــــــــــي
حمد هادي المسردي
ينجرح قلب.. لكن ترتفع هامه
-------------- والله امي لاموت ولاانحني راسي
لو رماني زماني وسط..دوامه
--------------العواصف شديده .. والجبل راسي
أنقل الحزن وامشي منتصب قامه
-------------- قاسي الوقت .. لكني بعد قاسي
واسمع الحلم يصرخ لحظه اعدامه
-------------- رابط الجاش ... ماهز الخبر باسي
عزتي غاليه ..والناس سوامه
-------------- قلت ماابيع حتى تقطع انفاسي
زانت ايام عمري .. شانت ايامه
-------------- مارجيت العزى من رحمة الناسي
من عجز لايدوس الهم باقدامه
-------------- لازم انه مع الايام ينداسي
يندمل جرح القلبٍ ..ماتت احلامه
-------------- بس ما اظن يبرى جرح الاحساسي
يوم صارت مابين القلب والهامه
--------------وش ابي بالحياة الياانحنى راسي
الأربعاء سبتمبر 03, 2008 8:01 pm
